شروط الاستخدام
تطبيق منجاح للأندرويد، ونسخة منجاح على الويب للآيفون، وموقع الاشتراك minjah.com
شنو منجاح
تطبيق يساعدك تمتحن نفسك بأسئلة فصول كتابك والأسئلة الوزارية ويّا أجوبتها. منجاح مو تابع لوزارة التربية ولا لأي جهة حكومية، والأسئلة والأجوبة محضّرة من المنهج والامتحانات الوزارية السابقة، وممكن يصير بيها غلط: بلّغ عنه من زر «بلّغ عن خطأ» ونصلّحه. ومنجاح يساعدك تدرس، بس ما يضمن درجة معيّنة.
الاشتراك
الامتحانات والأسئلة تحتاج اشتراك فعّال. الاشتراك 30 يوم أو 12 شهر من يوم التفعيل، لكل مواد الصف، وما يتجدد وحده. الكود أو الاشتراك الجديد ينضاف فوق الأيام الباقية.
حساب واحد لطالب واحد
الحساب برقم هاتف الطالب، ويدرس بجهاز واحد بنفس الوقت، وما ينشارك. والطالب الأصغر من 13 سنة يسوّي حسابه بموافقة ولي أمره.
الأكواد والمحتوى
كل كود ينستعمل مرة وحدة، والأسئلة للدراسة الشخصية بس، ما تنسخ ولا تنباع.
الدفع والتفعيل
داخل التطبيق ماكو أي دفع. الاشتراك ينفتح بحسابك برقم هاتفك: بسوبر كي نفعّله بنفس اليوم بعد ما نتأكد إن المبلغ وصل، وبالكود أول ما تكتبه. ادفع بس على الحساب المكتوب بموقع الاشتراك، واحنا ما نطلب منك رمز التحقق أو كلمة السر أبداً.
الاسترجاع والشحن
الاشتراك رقمي: ينفتح بحسابك بالتطبيق، وماكو شي ينشحن. بس كارت منجاح يوصل بالتوصيل المجاني، وتدفع للمندوب لما تستلمه، وإذا ما استلمته ما تدفع شي.
نرجّع المبلغ كامل إذا: انخصم مرتين لنفس الاشتراك، أو انخصم وما انفتح الاشتراك، أو صار غلط منّا وما كدرت تستخدم الاشتراك. وبعد ما يتفعّل الاشتراك ما يرجع المبلغ إلا بهاي الحالات. والاشتراك ما يتجدد وحده، فماكو أي سحب ثاني بدون ما تدفع بنفسك.
شلون تطلبه: راسلنا على واتساب أو على info@minjah.com من رقم حسابك، ويّا رقم العملية. ونرجّع المبلغ بنفس الطريقة اللي دفعت بيها، وللكارت بالتوصيل بالطريقة اللي تناسبك.
تغيير الأسعار
الأسعار ممكن تتغيّر بالمستقبل، بس الاشتراك الفعّال ما يتأثر: يبقى لحد نهايته بنفس اللي دفعته.
إيقاف الحساب
إذا انشارك الحساب ويّا ناس هواية، أو انباعت الأسئلة أو انتسخت، أو انستعمل لغش أو تلاعب بالدفع، نوقف الحساب بعد ما ننبّه صاحبه.
حذف الحساب
تكدر تحذف حسابك بأي وقت من التطبيق، وينمسح نهائياً. الأيام الباقية من الاشتراك تنمسح ويّاه. التفاصيل: صفحة حذف الحساب.
تغيير الشروط
إذا تغيّرت الشروط نحدّث التاريخ فوق، وإذا التغيير كبير ننبّهك بالتطبيق قبل ما يصير. والشروط تخضع لقوانين العراق. للتواصل: info@minjah.com أو واتساب الدعم +964 776 688 1775.