منجاحEnglish

سياسة الخصوصية

تطبيق منجاح للأندرويد، ونسخة منجاح على الويب للآيفون، وموقع الاشتراك minjah.com

سارية من: 19 تشرين الثاني 2026آخر تحديث: 19 تشرين الثاني 2026

ما نبيع البيانات لأحد، وماكو إعلانات ولا أدوات تتبّع ولا معرّف إعلانات.

منو احنا

منجاح تطبيق دراسة عراقي لطلاب الصفوف الوزارية: السادس الإعدادي، والثالث المتوسط، والسادس الابتدائي. هاي السياسة تشمل تطبيق منجاح للأندرويد على Google Play، ونسخة منجاح على الويب للآيفون، وموقع الاشتراك minjah.com. للتواصل بأي شي يخص بياناتك شوف القسم 12.

شنو نجمع وليش

البياناتليشإجباري؟
الحساب: رقم الهاتف، وكلمة السر (تنحفظ مشفّرة، واحنا ما نشوفها)حتى تدخل لحسابك من أي جهازإجباري
الملف: الاسم الأول واسم الأب، وطالب أو طالبة، والصف، والمحافظةحتى يطلعلك محتوى صفّك، وتنخاطب بالصيغة الصحإجباري
المدرسةحتى تنافس زملاءك بلوحة المتصدرين لما تنضافاختياري
اختيارات البداية: المواد اللي تحتاج تقوية، والأهداف، ومدة الدراسة باليومحتى تترتّب مراجعتك على قدّكإجباري
الدراسة: إجاباتك، وتقييمك لنفسك، وتقدّمك، ودفتر الأخطاءحتى يرجعلك السؤال بموعده، وتبين نسبة إتقانكتتسجّل وإنت تدرس
الجهاز: معرّف مشفّر للجهاز (بصمة من معرّف أندرويد، مو المعرّف نفسه)، واسم موديل الموبايل؛ وبالويب رقم عشوائي يحفظه المتصفححتى يشتغل الحساب بجهاز دراسة واحد بنفس الوقت، ونحمي حسابكإجباري
الاشتراك: نوعه، ومن وين انفتح، وشوكت يخلص، والأكواد اللي فعّلتها، وطلبات الدفع بموقع الاشتراكحتى ينفتح المحتوى، وتبين أيامك الباقيةإجباري
البلاغات: نص البلاغ، إذا بلّغت عن خطأ بسؤالحتى نصلّح السؤالاختياري

شنو ما نجمع

  • تسجيلات الصوت
  • رقم المحفظة أو البطاقة
  • الموقع الجغرافي
  • جهات الاتصال
  • الصور والملفات
  • معرّف الإعلانات
  • رقم IMEI أو رقم الشريحة

تسجيل التسميع يبقى بذاكرة الموبايل بس، وما ينرفع لأي مكان، وينمسح لما تطلع من الامتحان.

أذونات التطبيق

  • المايك: للتسميع بس، ولما تضغط زر التسجيل. التسجيل يبقى بالموبايل وما ينرفع.
  • الإشعارات: للتذكير بالدراسة، إذا وافقت.
  • الإنترنت وحالة الشبكة: حتى توصل الأسئلة، ونعرف إذا ماكو إنترنت.
  • الاهتزاز: حتى تحس بالجواب الصح والغلط، وتكدر تطفيه من «حسابي».
  • حفظ كلمة السر: إذا وافقت، الموبايل نفسه (مدير كلمات السر مال Google) يحفظ كلمة السر بحسابك عند Google، واحنا ما نحفظها.

وين تنحفظ ومنو يشوفها

البيانات تنحفظ بسيرفرات Supabase (خدمة قواعد بيانات)، والموقع ونسخة الويب على Cloudflare، والاتصال كله مشفّر (HTTPS). كل طالب يوصل لبياناته بس. ما نبيع البيانات ولا نعطيها لأحد للإعلانات، وماكو بالتطبيق أدوات إحصاء أو تتبّع لشركات ثانية. نعطيها بس إذا طلبها القانون العراقي بطلب رسمي.

الخدمات اللي تشتغل إلنا تشوف بس اللي تحتاجه حتى تسوي شغلها: Supabase (قاعدة البيانات والحسابات)، وCloudflare (الاستضافة)، وبوابات الدفع بموقع الاشتراك لما تدفع بيها.

الدفع

داخل التطبيق ماكو أي دفع. الاشتراك ينشترى من موقع الاشتراك أو بكود. كل اشتراك من الموقع ينحفظ «طلب» برقم: الباقة والمبلغ وطريقة الدفع وتاريخه وحالته. بسوبر كي تحوّل بنفسك من تطبيقهم، والوصل اللي تدزه على واتساب أو تليجرام يبقى بالمحادثة، ورقم العملية اللي بالوصل ينحفظ ويّا الطلب حتى نطابق الحوالة. وبالبوابات تدفع بصفحة البوابة نفسها، واحنا نستلم بس إن الدفع تم ورقم الدفع والمبلغ. رقم المحفظة أو البطاقة ورمز التأكيد ما يوصلنا أبداً.

شكد تبقى البيانات، والحذف

البيانات تبقى ما دام الحساب موجود. لما تحذف حسابك ينمسح الحساب وكل بياناته فوراً ونهائياً. يبقى بس بدون اسمك: اسم المدرسة إذا كتبته (بقائمة المدارس)، والبلاغات عن أخطاء الأسئلة، وإن الكود اللي فعّلته صار مستخدم، وطلبات الدفع (الباقة والمبلغ والتاريخ) لأنها سجل المبيعات. وإذا السيرفر بيه نسخ احتياطية، البيانات المحذوفة تنمسح منها وحدها خلال 30 يوم.

شلون تحذف حسابك: صفحة حذف الحساب.

الأطفال والطلاب الأصغر من 13 سنة

منجاح بيه صف السادس الابتدائي، وأعمار طلابه تقريباً 11 لـ 12 سنة. هيج نتعامل ويّاهم:

  • إذا عمر الطالب أقل من 13 سنة، لازم ولي أمره يوافق ويساعده يسوّي الحساب، أو يسوّيه هو.
  • نجمع منه نفس البيانات القليلة اللي بالقسم 2 بس، وللأسباب نفسها، وما نطلب أي شي زايد حتى يكمل.
  • ماكو إعلانات، ولا أدوات تتبّع، ولا معرّف إعلانات، ولا موقع جغرافي، وما نعرض اسم أي طالب للناس.
  • تسجيل صوته للتسميع يبقى بالموبايل وما ينرفع.
  • ولي الأمر يكدر يشوف بيانات ابنه أو بنته، ويطلب تصليحها أو حذفها، أو يوقف استخدام الحساب، برسالة (القسم 12).
  • إذا عرفنا إن حساب طالب أصغر من 13 سنة انسوّى بدون موافقة ولي أمره، نحذفه.

الأمان

الاتصال مشفّر (HTTPS)، وكلمات السر تنحفظ مشفّرة، وقواعد بالسيرفر تخلي كل طالب يوصل لبياناته بس، والحساب يشتغل بجهاز دراسة واحد بنفس الوقت، وتسجيلات الصوت ما تطلع من الموبايل. ماكو نظام مضمون 100%، بس نحمي البيانات بكل اللي نكدر عليه، وإذا صار شي يخصك نبلّغك.

حقوقك

تشوف بياناتك بالتطبيق، وتصلّح اسمك ومدرستك من «حسابي». وتكدر تطلب نسخة من بياناتك أو تصليحها أو حذفها برسالة من نفس رقم حسابك (القسم 12).

إذا تغيّرت السياسة

نحدّث التاريخ فوق، وإذا التغيير كبير ننبّهك بالتطبيق قبل ما يصير.

التواصل

نرد خلال 7 أيام.